Definisyen Fonologi
Fonologi
nya siti bidang penemu linguistik ti mansik munyi jaku dalam sesebengkah bansa
jaku sereta fungsyen iya dalam sistem munyi jaku. Bidang tu mega betungkapka
reti munyi sereta bekaul enggau munyi jaku sereta mesej ke deka dikenataika
orang ti mansutka jaku ngagai peninga ti nerima jaku nya.
Nitihka
pansik Bertil Malmberg (1968) pasal fonologi madahka tu siti ari bidang ti
mansik jaku mensia ti mansik sistem munyi jaku. Nitihka Malmberg mega fonologi tu
dibagi ngagai empat bengkah bidang ke mit agi ngambika nyamai agi diperati ke
kitai. Empat bidang ke mit tu iya nya penemu fonetik rama, fonetik deskriptif,
fonetik sejarah enggau fonetik normatif.
Lansa
pasal fonetik rama tu iya nya mansik sebarang munyi jaku ti diasilka mensia
sereta fungsyen mekanisme jaku ti pansut ari mulut mensia. Pekara ti dipansik
bekaul enggau munyi jaku ti diasilka lalu ni bagi organ artikulasyen ti
bekereja lebuh ngasilka munyi jaku nya. Nitihka ka Malmberg penemu fonetik deskritif
mansik leman dalam sesebengkah jaku tauka dialek jaku. Pekara ti dipansik iya
nya, baka ni dialek jaku tau nyadi dalam sesebengkah bansa jaku ti sama.
Chunto, jaku iban saribas enda sama dialek enggau jaku iban ari remun.
Nyadi
fonetik sejarah tu mansik baka ni fonetik ulih berubah dalam sesebengkah jaku.
Reti nya, penemu fonetik sejarah tu mansik baka ni jaku tau berubah datai ke
sehari tu lalu nama pekara ti tau ngasuh iya berubah. Lalu fonetik ti kepenudi
iya nya penemu fonetik normatif ti ngemeranka pengawa beratika set raup (rumus)
tauka atur ngena jalai jaku ti nentuka jaku ti disebut nya betul. Dalam hal tu, iya belabaka mensia
ending udah bisi norma tauka standard atur bejaku ti betul. Chunto iya, orang
Undup-Simanggang bejaku ngena dialek Balau lalu Betong-Saratok bejaku ngena
dialek Saribas.
J.D.O’
Conor (1984) dalam bup iya phonetics,madahka
fonologi tu siti bidang penemu linguistik ti besangkut paut enggau munyi ti
diasilka mensia. Nitihka iya mega, munyi ti didinga nya rurun munyi ti suah
ditemu dalam jaku dalam jaku raban bansa ti ngena iya. Nyadi munyi nya bekaul
enggau mesej ti deka dikenataika.
David
Abercrombie (1971), dalam bup iya Elements
of General Phonetics, ngumbai fonologi ngembuan tukuh teknikal lalu dalam
bidang linguistik sesebengkah jaku iya deka diperati ngena chara analitikal, reti nya kitai ukai semina ninga
munyi jaku tang mega beratika mekanisme rengka tubuh ti nyempulang jaku ti
disebut nya tadi.
Indirawati
Zahid & Mardin Shah Omar (2006) dalam bup iya Fonetik dan Fonologi, ngumbai fonologi nya siti bidang linguistik
ti mansik pasal munyi jaku ti diasilka mensia. Pekara ke dipansik iya nya deka
nemu baka ni munyi jaku diasilka organ sebut mensia enggau baka ni munyi jaku
nya tau ulih dikelaska.
Abdullah
Hassan (2006) dalam bup iya Linguistik Am,
madahka iya bisi udah ngasilka pansik pasal munyi jaku mensia mega. Definisyen
fonologi ke diberi iya nya siti bidang linguistik ti mansik munyi jaku ti
diguna mensia lebuh sida bejaku.
Abdullah
(ibid), ngelanjarka pansik iya ngagai transkripsyen munyi jaku ti didinga iya.
Retinya, iya ngaga lambang dikena nanda tiap-tiap bengkah munyi jaku ti
didinga. Retinya, iya ngaga lambang dikena iya nanda tiap-tiap bengkah munyi
jaku ti didinga. Nya alai sebarang sapa ti belajarka fonologi, enda tau enda
meretika proses ngaga transkripsyen munyi. Lambang ti dikena nanda munyi nya
mih ti dikumbai lambang fonetik. Nya alai, ditu kitai meda fonologi nya siti
bidang penemu ti mansik sistem tauka struktur munyi jaku. Nyadi nitihka pansik
orang-orang ke landik senentang linguistik tu, fonologi tu sebengkah pekara ke
mansik pasal sistem munyi jaku.
Definisyen Fonetik
Pansik
munyi jaku ti diasilka organ artikulasyen nya dikumbai fonetik. Nyadi reti
fonetik tu iya nya, pekara ke mansik pasal produksyen enggau persepsyen munyi
jaku. Tubuh kitai mensia disikap enggau organ ti tau ngeluarka munyi jaku ngena
mekanisme dalam tiga bengkah rumbang iya nya disebut rumbang mulut, rumbang
idung enggau rumbang farikns. Ditambah ke nya mega, fonetik tu ulih dibagi
ngagai tiga bansa iya nya, fonetik artikulasyen, fonetik akuistik enggau
fonetik auditori. Nya kebuah fonetik begunaka pengawa mansik tiap-tiap leman
munyi, lalu ngasilka transkripsyen ungkup tiap-tiap leman munyi ari semua jaku.
Nitihka
pansik Paitoon M. Chaiyanara (2006) dalam bup iya Pengenalan Fonetik dan Fonologi, madahka semua munyi jaku pansut
ari mulut mensia. Nya alai, bidang fonetik mansik rengka tubuh mensia ti
ngasilka munyi jaku.
Abdullah
Hassan (2006) dalam bup iya Linguistik Am,
madahka ti mansik leman munyi jaku ti beguna lebuh berandau. Iya mansik munyi jaku ti didinga iya lalu
bunyi nya tadi dipechah-pechahka ngagai unit munyi ti mit agi, lalu udahnya iya
nyeritaka nama pangka tauka biuh reti ngagai orang ti mendingka jaku nya.
Kelimpah arinya mega, nerangka organ sebut ti ngasilka munyi jaku lalu nerangka
ni bagi organ sebut ti ngasilka munyi jaku lalu nentuka sekalika munyi ti
pansut nya begetar tauka enda, sekalika peti sura nyawa nya tutup tauka enda.
Nyadi munyi ti pansut nya tadi tau dikelas ngagai vokal enggau konsonan. Munyi
nya tadi tau mega ditranskripsyenka, reti iya nya diberi lambang tauka simbol.
Lambang tu tadi mih ke disebut fonetik.
Bertil
Malmberg (1968), ti mekuh pansik senentang fonetik dalam bup iya Manual of Phonetics, mantaika sekeda
asil pansik munyi jaku. Pansik tu endang ngemeranka munyi jaku, iya nya unit ti
diguna dalam leka jaku ke disebut orang ti bejaku.
J.D.O’Conor
(1984) dalam bup Phonetics, mega bisi
ngupas penemu ti bekaul enggau munyi ti diasilka mensia. Munyi ti didinga lalu
diberi tukuh enggau fungsyen dalam raban bansa nya empu, tukuh enggau fungsyen
jaku deka disempikutka sida enggau mesej ti deka dikenataika lebuh sida
bejaku. Chunto baka leka jaku cheremin, peninga ulih ngaga tukuh ba
munyi /ch/, /e/, /r/, /e/, /m/, /i/, /n/. Tukuh tauka urup tu dipejantika nyadi
leka jaku /cheremin/, lalu dipeda fungsyen iya sereta dikaitka enggau mesej ti
deka dikenataika.
Lebuh
maya ngasilka munyi jaku, bisi tiga bengkah proses nyadi, iya nya fonetik artikulasyen, fonetik akustik enggau fonetik auditori. Nyadi fonetik
artikulasyen siti ari bidang ti mansik chara sesebengkah munyi diasilka
rengka artikulatori ba tubuh kitai mensia. Nya kebuah mayuh bengkah rengka
artikulatori kitai mensia diguna lebuh munyi jaku pansut ari rumbang nyawa.
Endur munyi nya diasilka disebut palan artikulasyen ti befungsi ngeluarka munyi
jaku. Fonetik akustik tu mega iya nya bidang ke mansik munyi jaku
kitai. Fonetik tu bekenangka pasal mansik gelumbang angin ti mai munyi nya
ngagai pending mensia. Kebendar iya fonetik akustik tu mansik klasifikasyen
munyi ti pansut ari mulut kitai, ari segi fitur fizikal ambika chunto, empas
munyi, pengelantang munyi, enggau pemanjai munyi sebut. Kepenudi bendar iya nya
fonetik
auditori bekaul enggau pekara mending sereta proses ti nydi lebuh kitai
nerima munyi lalu baka ni munyi tu diasai tauka didinga kitai. Hal ke bakatu besangkut
paut enggau perengka tubuh ti bukai baka untak enggau pending. Chunto, munyi ti
dibai angin lalu kitai ngasaika tauka nerima stimulus nya ngena pending.
Jaku simpul senentang
definesyen fonetik tu iya nya pansik saintifik ti bejuraika pasal jaku kitai
mensia.ba bidang fonetik tu, batang pekara ti deka dipejuraika kitai baka ni
munyi jaku diasilka organ sebut ba palan artikulasyen, baka ni munyi nya dikena
lebuh maya bejaku, baka ni kitai tau ngerikut munyi tu ke dalam tukuh lambang
tauka karang lalu baka ni mega kitai ulih ninga sereta ngelala bemacham munyi
jaku. Ba bidang tu mega kitai ngemeranka
munyi ti beguna lebuh bejakuka, pemanjai munyi sereta enggau variasyen munyi
nya. Nya alai symbol fonetik nya beguna amat laban symbol nya mih tanda ti ngelai
munyi ti didinga kitai. Ari aspek auditori, pending kitai mensia endang
senaka-naka iya pengelansik laban ulih mida bemacham munyi ti didinga lalu mida
munyi vokal, konsonan enggau diftong tauka munyi bukai. Munyi tu nyadi ketegal
putar dilah enggau mulut lebuh ngesuhka munyi jaku.
BANDING TAUKA BIDA FONETIK
ENGGAU FONOLOGI
FONETIK
|
FONOLOGI
|
Pansik senentang gaya asal
produksyen enggau persepsyen munyi jaku ti diasilka.
|
Pansik senentang sistem
munyi sesebengkah bansa jaku enggau gaya asal sistem iya.
|
Dibiah
ngagai tiga bansa :
I.
Fonetik artikulasyen
II.
Fonetik akustik
III.
Fonetik auditori
|
Pansik senentang kaul siti
leka jaku enggau leka jaku ke bukai ti dikena ngaga ayat.
|
Mansik semua elemen munyi
|
Mansik pola intonasyen
|
Ngasilka transkripsyen
fonetik ke semua munyi jaku semua mensia
|
Ngasilka sistem sepil
sesebengkah bansa jaku
|
No comments:
Post a Comment